Телемез.Татар!

Мәңгелек

Электрон китап
Автор: Адлер Тимергалин
​Иңдерү калыплары:
EPUB PDF MOBI TXT
Онлайн уку калыплары: PDF TXT
Өзек:

Мин зур шәһәргә гыйлем эзләп килдем, һәм әтием мине үзенең күптәнге танышы Самми түтәйгә урнаштырды.
Самми түтәй тормышын көч-хәл белән генә алып бара торган бер тол хатын иде. Ул һәрвакыт киң кара күлмәк киеп йөри, һәм аның зарланмаган көне бик сирәк була.
Базарда бәрәңге белән сельдерей хакы әле күтәрелә, әле төшә, ләкин нәтиҗәдә ул күтәрелгәннән-күтәрелә бара. Кибетләрдәге бәяләр турында сөйләп торасы да юк. Бу үзгәрешләр Самми түтәйнең йөрәген телгәлиләр, көмеш пизарроларны әледән -әле санап торырга мәҗбүр итеп, дер-дер калтыраталар иде. Мин аны бик кызганам, аңа ярдәм итәсем, аның кайгы-хәсрәтсез яшәгәнен, бер генә тапкыр булса да елмайганын күрәсем килә. «Самми түтәй матур елмая торгандыр»,— дип уйлыйм мин, анын бик иртә кырау төшкән чәчләренә, күм-күк иреннәренә карап торам да түтәйнең бердәнбер кызы Диноны искә төшерәм.
Дино, миннән ике генә яшькә олырак булса да, инде үз көнен үзе күрә башлаган, үзен һәм әнисен туйдырырлык акча таба торган кыз иде. Ул ювелир кибетендә эшли. Ә үзе әллә артык тәкәббер иде инде шунда — мин моны тиз генә аңлый алмадым. Ул миңа эндәшми, иртә-кичләрен күрешкәндә, күз кырые белән генә карап, беленер-беленмәс кенә баш ия дә бүлмәсенә кереп китә. Ә мин аның эре боҗралы көдрәләренә, тәненә сыланып торган джемперына һәм нәзек үкчәле ялтыравык түфлиләренә карап калам. Диноны мин модалар журналындагы нечкә бил сурәтләргә охшата идем.

Фикер алышу урыны

Сезнең email адресыгыз күрсәтелмәячәк.


*