Телемез.Татар!

Вәрфәләми төне.

Вәрфәләми төне. Белла Әхмәдуллина.

Зөлфәт тәрҗемәсе.

Оеп яңгыр ява… Сәер бер уй
Дер селкетә минем күңелне:
Суеш барган чакта туган сабый
Шәригатькә хыйлаф түгелме?

Кан туена изге Вәрфәләми
Бәндәләрне дәшкән ул төндә
Яңа туган сабый елаганны
Ишетмәде бугай беркем дә.

Елады ул янган ике утның
Уртасында калган хәлендә —
Гугенот та тугел әлегә ул,
Католик та тугел әлегә.

Аңсыз бәти, табигатьнең әле
Сайрап карамаган бер кошы —
Суелганның бугазыннан чыккан
Сулыш булды тәуге сулышы.

Бал-ширбәтләр күпме каптырсаң да
Булмас инде, әби, сыйлама —
Яшь канында аның чит сулыш бар,
Татлырак шул канлы тын аңа.

Тәмле тамак — һаман шуны сорый,
Аңламый тән яман ялгышын —
Ул йотлыгып һаман йота шулай
Суелганның бугаз сулышын.

Диннәр өчен, һәлакәтләр өчен
Һичбер гаебе дә юк аның,
Үпкәсенә рәхәт — сулый бирә
Сизми канлы сөрем йотканын.

Балачакмы, кара явызлыкмы —
Кем йоклата төреп юрганга?
Сабый күргән төшне азгын итә
Палач та һәм канлы корбан да.

Бу дөньяга күзен ачкан мәлдә
Әверелер агу язмышка.
Ни ул шөһрәт — адәм үтерүме?
Йә үлүме? Ни дип кан куша?

Данмы әллә черү бер кол булып?
Суеп-кырып кеше даулый дан.
Курыкмыйча бала тирбәтәсез,
Курыкмыйсыз бугай сабыйдан.

Борчылмагыз уянганда сабый
Йокысыннан елап, сискәнеп —
Кан эчәргә әзер сөт тешләре
Уртка гына тиеп киткәндер.

Курыкмагыз, агач арасыннан
Котны алып кемдер караса —
Явыз назда тибрәп-тибрәп үскән
Бәләкәчләр генә ләбаса.

Хәер, бәлки шулай, бүтән язмыш
Таләп итеп сабый елыйдыр,
Йөрәк яргыч афәт авазлары
Зәгыйфь бугазына сыймыйдыр?

Сүзгә сыймас бу коточкыч аваз,
Сыймас аваз һичбер нотага.
Хәер, чүп-чар бит бу! Нибарысы
Утыз өч мең гугенот кына…

Тулырак

 

Фикер алышу урыны

Сезнең email адресыгыз күрсәтелмәячәк.


*